UKIORTAAMI OQAASEQAAT

Monday 7th of May 2018

Monday 7th of May 2018

Inuit Issitormiut Siunnersuisoqatigiiffiannit – ICC Kalaallit Nunaannit tamassi 2017-imi
Ukiortaami Pilluaqquassi
All.: Hjalmar Dahl, ICC Kalaallit Nunaanni siulittaasoq
2016-ip ingerlanerani nuannersunik pissarsinartunillu ingerlassani suleqateqarluarsimanerput
pillugu qujarusuppugut. ICC Kalaallit Nunaannit tamassi Ukiortaami Pilluaqquassi.
Silap pissusaanni periarfissat aporfissallu
Issittumi avatangiisitta mianernartuunera tamanit ilisimaneqarpoq, ukiunilu makkunani tamanna
ersarissiartortumik namminneq isitsinnik takusinnaalersimavarput. Piniartut ukiut siuliini
ukiuunerani sikup siaruarnissaanik pisariaqartitsilluinnartut ullutsinni sikusarnerata allanngornera,
ukiullu ingerlanerani piffissami annertuumi piniariarsinnaajunnaartitsinera oqaluttuarisarpaat.
Issittup imartai aqqusaartorlugit angalasinnaanermut periarfissat nutaat amerliartorput, taamatullu
aamma pisuussutinut uumaatsunut qanillattornissaq pisariunnginnerulerluni. Tamatumani
misissueqqaarnissanut, tamannalu periarfissinneqassappat uuliamik gas-imillu imartatsinni Baffinip
Kangerliumarngani qalluisoqarsinnaalissalluni.
Baffin-ip Kangerliumarngata sineriaani tamaani inuit piniartuusut taamatut ineriartortoqarnissaanik
nalorninartorsiortinneqalerput. Issittumi nunap immikkoortuini ICC-qarfinni, taamatullu ICC
Kalaallit Nunaanni sinerissap avataani ingerlatsiniarnerit annertuumik ernummatigineqarput.
Taamaammat Amerika-mi præsident-ip tunuartussanngortup Obama-p taama aarlerinartoqarnera
paasilluarmagu nuannaarutigalugu tusarparput. Taamaalillunilu iliuuseqarsinnaatilluni
aalajangikkaminut kingullernut ilaatillugu naalagaaffiup Amerika-p Issittortaani imartani
annertuunik nutaanik uuliasiortoqarnissaanut gas-isiortoqarnissaanullu atajuartussamik
inerteqqusiilluni. Kinguninngualu Canada-mi ministeriunerup Trudeau-p Canada-p Issittortaata
imartaani assigisaanik aamma mattussilluni.
ICC Canada aamma ICC Kalaallit Nunaat ukiuni makkunani ”Pikialarsorsuup” aqutsiveqarfittut
ingerlanneqarnera pillugu annertuumik suliniuteqarput. Pikialasorsuaq tassaavoq immap
immikkortua polynia-mik taaguuteqartinneqartoq annertooq, ukiorlu kaajallallugu sikuneq ajortoq.
Baffin-ip Kangerliumarngani Canada-p nunattalu akornanni inissisimavoq. Ilisimasat
pissarsiarisinnaasat tamaasa, pingaartumillu atuisut ilisimasaat, katersorneqarput, taakkualu
tunngavigalugit Pikialasorsuup siunissami piujuaannartitsineq toqqammavigalugu
aqutsiveqarfiunissaa qulaajarneqarluni.

Naalakkersuinikkut qanorluunniit iliuuseqarniartoqaraluarpat ICC Kalaallit Nunaannut
tunngaviusumik pingaaruteqarluinnartoq tassaavoq aalajangiiniarnerni ingerlatsinerit tamat
oqartussaaqataanerat tunngavigalugu pisarnissaat. 2016-ip ingerlanerani naalakkersuinikkut
aalajangiinissat tungaasigut pilersaarutit innuttaasunut avatangiisinullu sunniuteqartussat
pineqaraangata innuttaasut peqataatinneqarnerisa qitiutinneqarnissaa immikkut pingaartillu
sammisimavarput.
Inuussutissarsiornerni aningaasarsiornernilu ingerlatitsinerni aallarnikkat ineriartortitallu ICC-p
tungaanit pimoorussamik tapersersugarineqarmata naqissuserusupparput. Taamaalilluni ICC Alaska
Issittumi aningaasarsiornikkut ineriartortitsineq pillugu peqataaffigineqarluartussamik 2017-imi
marts-ip qaammataani Anchorage-imi ataatsimeersuartitsiniarpoq.
Eqqaamassavarput tamatta inuugatta assigiinngitsuulluta, tamannalu 2017-imi iliuuseriniakkatsinni
tamani pingaartittuartariaqaragatsigu.

Subscribe to our newsletter